L'istorgia da chanzunettas.ch
Il bab dal project
Dominique Huber, naschì il 1980, è bab da dus uffants ed ha fatg da sia passiun sia professiun. Dapi passa diesch onns sgola el sco pilot per las Swiss International Air Lines. Dasperas sa deditgescha il musicist da professiun (dirigent, pianist e scolast da musica) gugent e cun grond plaschair a la musica: el fa arranschaments per chors, bands ubain orchesters, dirigia producziuns da musical pli grondas ed iniziescha adina danovamain projects musicals che sa basan sin sias atgnas ideas.
Durant il lockdown dal 2020, cura che ses aviun ha stuì restar giun plaun, ha Dominique Huber prendì per maun ses pli nov project. El ha realisà durant quel temp ses giavisch da metter a disposiziun gratuitamain ina vasta collecziun da chanzuns d’uffants modernisadas sin differentas plattafurmas. Durant plirs mais ha el fatg durant il di scola a distanza e la notg ha el producì passa 100 chanzuns d’uffants cun dapli che 50 chors d’uffants e classas da scola. E quai è mo l’entschatta – numerusas autras chanzuns suondan.
Chanzuns d’uffants
… ina tematica colliada tar bleras e blers cun regurdientschas d’uffanza persunalas e spezialas. Ina chanzun da durmir avant che serrar ils egls, ina chanzun da viandar durant ina tura en muntogna ubain ina chanzun che gidava a prender il mal, sch’ins era crudà. Tut gieva pli tgunsch, sch’ins pudeva chantar e tadlar.
Chanzuns d’uffants sveglian emoziuns e dattan in sentiment da segirtad e levezza. Babs e mammas, tats e tattas, padrins e madritschas, augs ed ondas pon sa servir da questas chanzuns durant ch’els passentan il temp cun lur uffants, biadias, figliols e nezzas. En pli na dastg’ins betg emblidar la gronda valur pedagogica da questas simplas chanzuns per l’instrucziun en scolina e sin il stgalim bass.
Las chanzuns d’uffants èn in impurtant bain cultural ch’i vala da tgirar
chanzunettas.ch è ina plattafurma che metta a disposiziun ad in grond public ina vasta collecziun da differentas chanzuns d’uffants svizras registradas ed interpretadas da nov. Las chanzuns duain far plaschair, intimar da siemiar u rir e cunzunt duain ellas regalar blers bels muments.